चिंचवड, ७ डिसेंबर -श्रीमन महासाधू मोरया गोसावी महाराज यांच्या 464 व्या समाधी संजीवन सोहळ्याच्या आजच्या दुसऱ्या दिवशी विविध धार्मिक व सांस्कृतिक कार्यकमांचे आयोजन करण्यात आले होते. यामध्ये प्रामुख्याने श्रींची महापूजा, सामुदायिक अथर्वशीर्ष पठण, महासाधू मोरया गोसावी महाराज यांचे चरित्र पठण, नेत्र व दंत चिकित्सा शिबिर, यापुढे दर संकष्टी चतुर्थीला नित्यनेमाने होणारी पवनामाईची आरती या आगळ्यावेगळ्या पण अतिशय स्तुत्य आणि सामाजिक कार्याचा (Sanjeevan Samadhi Mahotsav) विशेष उल्लेख करता येईल.
गणेशभक्तांचे श्रद्धास्थान म्हणून जगभर प्रसिद्ध असलेल्या महासाधू मोरया गोसावी महाराज यांच्या पावन स्पर्शाने ही भूमी अतिशय पावन झाल्याची भावना गणेशभक्तांमधे असते. आजच्या चतुर्थीच्या मुहूर्तावर रविवारची सुट्टी आल्याने मोरया भक्तांसाठी जणू ही (Sanjeevan Samadhi Mahotsav) पर्वणीच ठरली.
filter: 0; fileterIntensity: 0.0; filterMask: 0; br
मार्गशीर्ष मासातील शुभ संकष्टी चतुर्थी, रविवार दि. ७ डिसेंबर २०२५ रोजी श्रीमन् महासाधु मोरया गोसावी महाराज यांच्या ४६४ व्या समाधी उत्सवानिमित्त देऊळ मळा, श्री मोरया गोसावी समाधी मंदिर, चिंचवडगाव येथे आयोजित सामुदायिक अथर्वशीर्ष पठण अत्यंत भक्तिमय, मंगलमय आणि प्रेरणादायी वातावरणात यशस्वीरीत्या पार पडले. या धार्मिक उपक्रमात सुमारे १,२०० भाविकांनी उत्स्फूर्त सहभाग घेतला असून, यामध्ये महिला, ज्येष्ठ नागरिक, तरुणांसह विद्यार्थ्यांचा सहभाग विशेषत्वाने उल्लेखनीय ठरला.
पहाटेपासूनच मंदिर परिसर “गणपती बाप्पा मोरया” या जयघोषाने दुमदुमून गेला होता. सकाळच्या शांत व पवित्र वातावरणात भाविकांनी एकत्र येऊन अथर्वशीर्षाचे सामूहिक पठण केले. कार्यक्रमास मान्यवरांच्या शुभहस्ते दीपप्रज्वलन करून प्रारंभ करण्यात आला. त्यानंतर श्री दिलीप तांबोळकर यांचा शंखनाद व सामूहिक प्रार्थनेच्या पार्श्वभूमीवर पठणास सुरुवात झाली. सर्व भाविकांनी एकाच वेळी श्रद्धा व एकाग्रतेने केलेल्या पठणामुळे संपूर्ण परिसरात आध्यात्मिक शांतता, संयम आणि सकारात्मक ऊर्जेचा अनुभव प्राप्त झाला.
या कार्यक्रमास समाजातील विविध स्तरांतील नागरिकांची लक्षणीय उपस्थिती लाभली. विशेषतः विद्यार्थ्यांचा उत्साही सहभाग हा कार्यक्रमाचा महत्त्वाचा घटक ठरला. नव्या पिढीमध्ये धार्मिक व सांस्कृतिक मूल्यांची जपणूक व्हावी, या दृष्टीने हा उपक्रम प्रेरणादायी असल्याची भावना उपस्थितांनी व्यक्त केली. व्यासपीठावर ज्ञानप्रबोधिनी शाळा, माटे शाळा व क्रांतीवीर चापेकर शाळा यांचे विद्यार्थी व भार्गव आपटे (बालशाखा) असे बालचमू, श्रीमती प्रिया जोग, सौ. नेहा मोकाशी या सर्वांनी पडण्याची धुरा सांभाळली. मान्यवरांमध्ये श्री प्रविण कोठावदे, डॉ. अभय कुलकर्णी, श्री भास्कर रिकामे, श्री रविकांत कळंबकर तसेच स्वातंत्र्यवीर सावरकर मंडळ तील कार्यकारणी सदस्य, विविध भजनी मंडळे, अथर्वशीर्ष मंडळांचे प्रतिनिधी, तसेच गायत्री परिवाराचे श्री राजेंद्र देसले उपस्थित होते.
अथर्वशीर्ष पठणानंतर श्रीमन् मोरया गोसावी महाराजांची आरती करण्यात आली. त्यानंतर उपस्थित भाविकांना प्रसादाचे वितरण करण्यात आले. या वेळी धार्मिक, सामाजिक, सांस्कृतिक व शैक्षणिक क्षेत्रांतील मान्यवरांचा यथोचित सन्मान करण्यात आला. संपूर्ण कार्यक्रम शिस्तबद्ध पद्धतीने आणि भक्तिभावात पार पडल्यामुळे उपस्थित भाविकांमध्ये समाधानाची भावना दिसून आली.
या भव्य धार्मिक व सांस्कृतिक कार्यक्रमाचे आयोजन चिंचवड देवस्थान ट्रस्ट, चिंचवड, स्वातंत्र्यवीर सावरकर मंडळ, संस्कृती संवर्धन व विकास महासंघ आणि भजनी मंडळ महासंघ व अथर्वशीर्ष मंडळ यांच्या संयुक्त विद्यमाने करण्यात आले. आयोजनात स्वातंत्र्यवीर सावरकर मंडळ व संस्कृती संवर्धन व विकास महासंघाची भूमिका विशेष महत्त्वाची ठरली. कार्यक्रम यशस्वी होण्यासाठी सर्व पदाधिकारी, कार्यकर्ते व स्वयंसेवकांनी अथक परिश्रम घेतले. आयोजकांनी उपस्थित सर्व भाविकांचे तसेच सहकार्य करणाऱ्या संस्था व कार्यकर्त्यांचे आभार मानले.
अशा धार्मिक, सांस्कृतिक व अध्यात्मिक उपक्रमांमुळे समाजातील संस्कृतीचे जतन व संवर्धन होते, परंपरेशी नव्या पिढीचा सुसंवाद निर्माण होतो आणि समाजात सकारात्मक ऊर्जा, सामाजिक सलोखा व आध्यात्मिक मूल्यांची जोपासना घडून येते, असे मत आयोजकांनी व्यक्त केले. चिंचवड नगरीत अशा प्रेरणादायी उपक्रमांची परंपरा अखंड सुरू राहावी, हीच भाविकांची सामूहिक भावना होती.
“https://youtu.be/sW_hFqzfsSU?si=u0lef64c7YolNczI” align=”center” width=”” /]
