प्रतिनिधी:पिंपरी-चिंचवड परिसरातील घरांच्या वाढत्या किमतींच्या पार्श्वभूमीवर परवडणाऱ्या गृहनिर्माण योजनेला नागरिकांचा जबरदस्त प्रतिसाद मिळाला आहे. पुणे महानगर प्रदेश विकास प्राधिकरण (PMRDA) यांच्या योजनेतील ८३३ सदनिकांसाठी तब्बल ५,८४२ जणांनी नोंदणी केली. त्यापैकी ५,३६६ अर्जदारांनी अनामत रक्कम भरून अर्ज निश्चित केला आहे. परिणामी, एका घरासाठी अनेक इच्छुक अशी तीव्र स्पर्धा निर्माण झाली (PMRDA Homes) आहे.
मोशी प्रकल्पाला सर्वाधिक मागणी
मोशीतील पेठ क्रमांक १२ येथील प्रकल्पाकडे सर्वाधिक कल दिसून आला. आर्थिकदृष्ट्या दुर्बल घटकांसाठी (EWS-PMAY) उपलब्ध असलेल्या केवळ ५५ घरांसाठी २,२०२ जणांनी अनामत रक्कम भरली आहे. म्हणजेच एका घरासाठी सुमारे ४० जणांची स्पर्धा आहे.त्याच परिसरातील अल्प उत्पन्न गटासाठी (LIG) असलेल्या २८५ घरांसाठी १,९९४ अर्जदार मैदानात आहेत. यावरून मोशी परिसरातील घरांची मागणी किती प्रचंड आहे, हे स्पष्ट (PMRDA Homes)होते.
वाल्हेकरवाडीत तुलनेने संधी अधिक
वाल्हेकरवाडी (सेक्टर ३०-३२) येथील योजनेत घरांची संख्या जास्त असल्याने स्पर्धा तुलनेने कमी आहे. येथे EWS गटातील ३०६ घरांसाठी ४५९ अर्जदार, तर LIG गटातील १८७ घरांसाठी ७११ अर्जदारांनी अनामत रक्कम भरली आहे. त्यामुळे या भागात घर मिळण्याची शक्यता तुलनेने जास्त असल्याचे चित्र (PMRDA Homes) आहे.
कोट्यवधींची अनामत रक्कम जमा
या योजनेअंतर्गत एकूण ₹४ कोटी ४१ लाख ५४ हजार १२८ इतकी अनामत रक्कम प्राधिकरणाकडे जमा झाली आहे. डिसेंबर २०२५ मध्ये जाहीर झालेल्या योजनेची अंतिम मुदत २० फेब्रुवारी होती. अर्जांची छाननी पूर्ण झाल्यानंतर पात्र अर्जदारांची अंतिम यादी प्रसिद्ध केली जाणार असून, त्यानंतर संगणकीय प्रणालीद्वारे पारदर्शक सोडत काढली जाणार (PMRDA Homes) आहे.
संक्षिप्त आकडेवारी:
उपलब्ध सदनिका: ८३३
एकूण नोंदणी: ५,८४२
अनामत रक्कम भरलेले अर्ज: ५,३६६
जमा अनामत रक्कम: ₹४,४१,५४,१२८
परवडणाऱ्या घरांची मर्यादित उपलब्धता आणि वाढती मागणी यामुळे पिंपरी-चिंचवडमध्ये या सोडतीकडे सर्वांचे लक्ष लागले (PMRDA Homes) आहे.