प्रतिनिधी:निखळ मनोरंजन, समाजाचे आरोग्य संवर्धन आणि सांस्कृतिक प्रबोधन करण्याच्या उद्देशाने नमस्कार फाउंडेशनतर्फे आयोजित पाच दिवसीय नमस्कार महोत्सवाचा समारोप रविवार, दिनांक ०७ डिसेंबर २०२५ रोजी उत्साहात झाला. निगडी प्राधिकरणातील नियोजित महापौर निवास मैदानावर आयोजित या महोत्सवात विविध प्रकारचा विनामूल्य आरोग्य सल्ला आणि सुविधांचा लाभ नागरिकांनी मोठ्या संख्येने (Namaskar Mahotsav) घेतला.
महोत्सवात रविवारी सादर करण्यात आलेल्या ‘हीच खरी फॅमिलीची गंमत आहे!’ या धमाल नि:शुल्क विनोदी नाटकाला थंडीचा कडाका असूनही रसिकांनी मोठ्या प्रमाणावर उपस्थिती दर्शवली. एस. पी. क्रिएशन्स निर्मित आणि नवनीत प्रकाशित या नाटकाचे लेखन व दिग्दर्शन संतोष पवार यांनी केले असून, विसरभोळा बाप, ढालगज आई आणि दिवसा आंधळेपणाचा त्रास असलेली वयात आलेली सुंदर मुलगी असलेले कुटुंब तसेच त्यांच्या शेजारी राहणारे स्मार्ट बायको, कर्णबधिर नवरा आणि एक अडखळत बोलणारा व दुसरा रातांधळा असे दोन दीर असलेले कुटुंब यांच्या धमाल जुगलबंदीवर आधारित हे नाटक प्रेक्षकांना अक्षरशः खळखळून हसवत ठेवणारे ठरले. सागर कारंडे, शलाका पवार, प्रतीक पाध्ये, हर्षदा कर्वे, विनिषा कुलकर्णी, राकेश शालिनी आणि संतोष पवार यांच्या अप्रतिम अभिनयाला प्रेक्षकांनी उत्स्फूर्त प्रतिसाद (Namaskar Mahotsav) दिला.
नाट्यप्रयोगापूर्वी सामाजिक कार्यकर्ते सलीम शिकलगार, सरिता साने, विजया जोशी आणि नमस्कार फाउंडेशनचे अध्यक्ष सुहास जोशी यांच्या प्रमुख उपस्थितीत महोत्सवात योगदान देणाऱ्या व्यक्तींना स्मृतिचिन्ह देऊन सन्मानित करण्यात आले. ज्योती कानेटकर यांनी कार्यक्रमाचे सूत्रसंचालन करून (Namaskar Mahotsav) आभार प्रदर्शन केले.
